الحكم على الغير بدأ زمان من أيام الشيطان مصطفي حسني

الحكم على الغير بدأ زمان من أيام الشيطان
لما رفض انه يحترم آدم أبو الإنسان
وقال أنا أحسن منه...أنا أبو الشياطين
وده مخلوق تاني اتخلق من طين
الحكم على الغير ده طبع الشيطان
وبسببه اتقفل في وشه باب الرحمن
اقنع اليهود انهم أحسن من غيرهم ولعب بيهم
علشان كده لعنة ربنا نزلت عليهم
وبعدها سابهم وادّور علينا
وخلانا نسئ الظن بالناس اللي حوالنيا
واحد بتحكي بتقول دخلت مرة المسجد لابسة بنطلون
المحجبات وشهم احمر وضرب 100 لون
وبمنتهى الكبر بصّولي من فوق لتحت
ولما قعدت في وسطهم محستش اني ارتحت
هما مش عارفين ان ده بيت ربنا مش بيتهم!
لكن هما شايفين نفسهم أحسن عشان كده عملوا عملتهم
واقول لك حاجة...الحجاب فرض زي الصلاة وربنا اللي فرضه
وهو اللي هيحاسب عليه ولا انتي ربنا برضه؟!
وعشان بصراحة نكون منصفين
الكلام ده مينطبقش على كل المتدينين
والتاني من لحظة كان بيشجع الكورة ويقول يا لعيب!
ولما اللعيب سجد بعد الجون، قال " ايه ده؟! منظر عجيب!!"
لما تسجد بشورت شكلك بايخ
مع ان اللي بيتكلم لا فتح في الفقه ولا قعد تحت رجلين المشايخ
قال له بكبر: "عشان السجدة تتقبل منك غطي عورتك الأول!"
واللي كان بيشجع من شوية اتقلب لشيخ واتحول
مين الي قال لك ان سجدته مش مقبولة؟
سجدة الشكر مش محتاجة تغطية للعورة ...ودي بيدرسوها في سنة أولى
هو كده انتقاد وخلاص؟
لما بتقول رأيك في الناس؟
هل هو حب للانتقاد وخلاص؟
لما بتقعد تبص وتقيم في الناس؟!
أنا آسف يا جماعة فتحت موضوع علمي
وطلعت بره الكلام واشتكيت لكم همي
يا صاحبي بص لغيرك بعين الحب وخليك هين
واعمل زي حبيبك النبي وخليك على غيرك حنين
ودع الملك للمالك وخليك في حالك
وكل ما تحكم على غيرك قول لنفسك "أنت مالك!"

» خدع حول مفهوم تأخر المسلمين مصطفي حسني
» كيف تقلع عن التدخين في 5 أيام؟؟