للكوسة فى بلادى شئون

للكوسة فى بلادى شئون

بتخلى المسنود فرعون

يتفرعن فين مهما يكون

وتخلى الجاهل استاذ

والاعرج لاعب جمباز

وتخلى الاحول هداف

والكوره الاوت فى الجون

للكوسة فى بلادى شئون

لو تعرف شخصية كبيرة

شغالة ف البنك مديرة

راح تاخد من غير ضمانات

كام قرض بمليون مليون

وهروبك طبعا مضمون

وياعينى لو تعرف نايب

ف المجلس مش نايب خايب

راح تبنى ابراج وهمية

اوراقها مظبوطة اكيد

بعديها تروح المستشفى

وتقيد نفسك مجنون

احكامك تسقط فى ساعتها

بعديها ترجع موزون

واذا ساكن ف عمارة جديدة

وحبيبك راجل مسئول

فسيادتك من غير ماتقول

يركب لك فورا تليفون

ولو انت بتعرف فران

او واحد بياع جرنان

راح تاخد طلبك وحتمشى

من غير ولا دوشة ولادور

والناس الغلبانة حتاخد

طلباتها بعدك وتغور

ماهو كله غيرك بيهون

ولو انت زميل الحلاق

راح تحلق اولها زبون

واذا كنت بتعرف دكتور

حتعيش متطمن مسرور

وحتسلك فى لجان الشفوى

ومجال تعيينك موفور

وحتطلع فالتلفزيون

بالبدلة وفيها الببيون

تتكلم وبكل بساطة

عن شرف المهنة المدفون

لكن لو شاعر غلبان

قلت اللى ف نفسك على طول

حيقولو مين قال لك قول

ويهاجمك مليون انسان

للكوسة فى بلادى شئون